3 gipamusil sa Talisay

CEBU, Philippines - Tulo ka tawo ang gipamusil, usa kanila patay ug duha ang naangol sa managlahing tulo ka insidente sa pagpamusil niadtong Lunes ug kagahapon sa kaadlawon sa dakbayan sa Talisay.

Patay nang naabot sa tambalanan ang usa ka 19-anyos nga drayber sa habal-habal nga si Jonen Badano, residente sa barangay Dumlog human kini pusila sa duha ka wala mailhing mga lalaki niadtong Lunes sa gabii diha sa sitio Loyongan, barangay Lagtang, dakbayan sa Talisay.

Ang biktima nakaangkon og samad pinusilan sa tuong bahin sa ulo, walang bukton ug walang bahin sa lawas ug patay na pag-abot sa Talisay City District Hospital. Na-recover sa mga polis ang duha ka kabhang sa mga bala sa kalibre .45 nga pistola.

Sa mao gihapong adlaw mga alas 3:30 sa hapon usa ka Crispin Bonghanoy, 45, taga barangay Tapul sa nahisgutang siyudad ang kritikal ang kahimtang human pusila sa nakautang kaniya diha sa barangay Maghaway, Talisay.

Si Bonghanoy naigo sa walang bahin sa iyang ulo ug gidala sa Vicente Sotto Memorial Medical Center. Usa ka ginganlan og “Eddie” nga residente sa nahitaboan ang gitumbok nga mipusil sa biktima human niya paningli sa utang niining P15 mil.

Sa laing bahin, nalandig sa tambalanan ang usa ka drayber sa habal-habal nga si Wodilitlo Abacahan, 20, taga barangay Lagtang, human pusila sa wala mailhing drayber sa traysikol kagahapon sa kaadlawon diha sa barangay San Roque, Talisay.

Si Abacahan nakaangkon og samad pinusilan sa walang bahin sa ulo ug buko-buko diin ang bala milapos sa atubangang bahin dapit sa walang bukton samtang naghatud sa babayeng pasahero. Si PO3 Mikie Espina mibutyag sa Banat News nga ang pasahero ni Abacahan mibutyag kanilang adunay drayber sa traysikol nga nanghulga kaniya.

Ang maong babaye gihatud ni Abacahan sa barangay Poblacion sa pagtuong tua didto ang iyang mga amiga apan samtang nagpadulong didto usa ka traysikol ang misikit kanila ug nanangpit maong ilahang gipadul-an apan kalit silang gipamusil sa drayber.  – BANAT NEWS