CEBU, Philippines - Gihangop sa mga drayber ang pagsubo sa bag-o lang gisementong dalan sa V. Albano, sa barangay Bakilid, dakbayan sa Mandaue isip laing agianan sa panahon nga maghuot ang mga sakyanan sa dalan M.C. Briones Avenue ug M.L, Quezon Avenue sa barangay Maguikay, sa maong dakbayan.
Ang maong dalan nga gigahinan og mokabat sa P1.7 milyones nga salapi gikan sa Annual Investment Plan kaagian na usab sa higayong ablihan na ang gitukod nga mall sa maong lugar.
Si Barangay Kapitan Dionesio Villamor nga nahinabi sa Banat News miingon nga sa sayo pa mireklamo ang mga drayber sa traysikol tungod sa hilabihang libaong sa maong dalan nga maoy hinungdan sa kalisod sa ilang pag-agi.
Si Mayor Jonas Cortes nga maoy nangulo sa pagsubo sa maong dalan miingon nga daghan pa ang madasig sa pagbutang og mga patigayon sa nahisgiotang dapit sa umaabot nga mga adlaw.
“Makatabang sa paglambo sa maong barangay Bakilid ang maayong dalan kay makadasig man sa mga negosyante sa pagbutang sa ilang negosyo,” ni Cortes pa sa iyang pamahayag.
Si Cortes miingon nga ang gitukod nga mall sa maong dapit maoy pasiuna pa lamang nga mga patigayon sanglit daghan pa ang nagplanong momuntar og negosyo sa maong lugar.
Si Oscar Lipanto, 37, minyo nga taga barangay Maguikay ug drayber sa traysikol usa sa mipadayag sa iyang kahinangop sa kalamboan sa dalan sa maong lugar.
“Pait kaayo among pag-agi kaniadto kay kining dalan sa A Albano dagko kaayo og libaong ug dali kaayong mahilis ug mabuslot ang among ligid,” pamahayag pa niya. - Romeo T. Limpangog (BANAT NEWS)