CEBU, Philippines - Usa ka tinun-an sa Grade 2 sa Cabancalan Elementary School ang mireklamong gilabay og libro sa iyang magtutudlo tungod kay nasuko kining nag-away ang biktima ug classmate niini.
Base sa report sa TV Patrol Central Visayas kagahapon, ang magtutudlo kinsa wala hinganli giingong kalit nga milabay og libro sa bata hinungdan sa pagkalagom sa walang mata niini.
Ang ginikanan sa bata mipadayag nga desidido silang mopasaka og kaso batok sa maong magtutudlo samtang ang prinsipal sa maong tunghaan sa mao gihapong report nagkanayon nga nakahinabi na niini ang amahan sa bata.
Base sa resulta sa pagpakurasyon sa bata mitumaw nga nakaangkon kini og internal injuries sulod sa mata, hinuon wala na kinahanglana pang i-confine sa tambalanan ang bata.
Ang maong magtutudlo sumala pa sa report giingong giimbestigar na sa prinsipal nilang si Maria Corazon Yosores kabahin sa reklamo sa maong bata. – BANAT NEWS