CEBU, Philippines - Usa ka mamasurahay ang namatay human madumboli kagahapon sa alas 3:45 sa kaadlawon sa Doña Rita Village, Gov. Cuenco Avenue, barangay Banilad, ning dakbayan.
Ang biktima wala pa mailhi tungod kay dili man kini residente sa lugar nga nadumbolan kini. Apan gihulagway kini nga usa ka mamasurahay nga nagsakay og traysikad ug anaa sa hingkod nga pangidaron.
Ang nakadasmag wala usab mailhi sa mga awtoridad tungod kay mipasutoy kini sa pagpadagan human sa insidente.
Apan gihulagway sa pipila nga nakasaksi nga nagmaneho kini og usa ka Sedan nga sakyanan kolor itom.
Tungod kay kaadlawon nahitabo ang aksidenti, wala kaayoy mga tawo sa lugar hinungdan nga walay nakakita ug nakakopya sa numero sa plaka sa sakyanan.
Base sa pasiunang imbestigasyon nga ang biktima nagpatunga sa dalan samtang nagmaneho sa traysikad nga gisudlan sa mga nakuha niini sa basurahan ug sa dihang mipasirit og padagan ang sakyanan nga Sedan, nadumbolan niini ang traysikad hinungdan nga nalagpot ang mamasurahay ug namatay.
Miresponde ang traffic enforcer nga si Lyndon Ocampo, apan walay nahimo tungod kay hit and run ang sitwasyon. Hinuon nag-imbestigar na ang kapolisan. – BANAT NEWS