Babayeng sikop sa buy-bust; Laing 3 nakuhaan og shabu

CEBU, Philippines - Usa ka babayeng gipasanginlang notado nang mamaligyaay og shabu nasikop sa kapolisan sa siyudad sa Danao samtang laing tulo ka lalaki nasikop usab human makuhai og shabu sa lungsod sa Carmen.

Ang nasikop mao si Berla Laude, 50, molupyo sa dalan Oliver barangay Poblacion, siyudad sa Danao.

Samtang ang ang tulo ka lalaki nga nasikop mao sila si Jonathan Alburo, 27, molupyo sa Bakhawan, lungsod sa Daanbantayan, Jestoni Bahio, 23, molupyo sa barangay Mactan, siyudad sa Lapulapu ug Navarete “Juanito” Aying, 33, molupyo sa sitio Soong, Mactan, siyudad sa Lapulapu.

Pasado alas 9 sa miaging gabii sa dalan Oliver, barangay Poblacion, siyudad sa Danao ang kapolisan sa Provincial Anti-Illegal Drugs Special Operation Task Group (PAIDSOTG) nga gipanguluhan ni SPO4 Ernesto Navales ug kaubanan ug mga sakop sa Philippine Drug Enforcement Agency (PDEA) mipahigayon og buy-bust operation batok ni Laude.

Usa ka polis nagpaka-aron-ingnon nga mopalit og shabu nga nagkantidad og P500 ug sa dihang mitunol na si Laude sa iyang gibaligya dali usab dayon mihatag og senyas ang asset nga maoy mipalit ug didto gisikop si Laude.

Sa dihang nasikop si Laude, gikapkapan kini ug nakuha niini ang tulo ka taas nga plastic nga daw adunay sulod nga gituohang shabu, upat ka medium size plastic nga adunay sulod nga gituohan, shabu lain usab nga upat ka medium size plastic sachet nga gituohang shabu ug tulo ka gagmay’ng plastik sa gituohang shabu.

Human sa pagkasikop ni Laude gi-turnover kini sa kapolisan sa Danao aron itanggong samtang wala pa mapasaka-i og kasong kalapasan sa pagpamaligya og ilegal nga drugas.

Samtang sa pakighinabi sa Banat News ni Insp. Aldrin Villacampa mibutyag kini nga sa wala pa masikop si Laude duha usab siya ka bulan nga nag-surveillance niini human siya makadawat og impormasyon kalabot sa ilegal nga kalihukan niini.

Matud pa ni Insp. Villacampa nga notado usab si Laude nga mamaligyaay og shabu apan wala siya makaseguro og unsa kini siya nga level.

Sa laing bahin, pasado alas 8 sa miaging gabii, ang kapolisan sa Carmen mipahigayon og checkpoint sa highway sa barangay Poblacion ug nakasikop og tulo ka lalaki nga nakalapas sa lagda sa trapiko.

Nasayran nga ang tulo ka lalaki nagsakay sa ilang Honda Wave nga motorsiklo (7620-GIN) nga gimaneho ni Alburo ug sakay silang Bahio ug Aying.

Sa dihang naabot sila sa lugar diin gipahigayon ang checkpoint, ang tulo adunay kadudahang lihok ug sa dihang gipahunong aron pangitaan og lisensya si Alburo wala kini makapakita.

Tungod sa mga kadudahang lihok sa tulo, gikapkapan kini sa kapolisan ug didto nakuha gikan sa kamot ni Alburo ang tulo ka pakete nga gituohang shabu, lighter diha sa kamot ni Bahio. Misuway pa unta kini og labay sa maong mga butang. Samtang si Aying nakapkapan usab og usa ka paketeng gituohang shabu.

Tungod niini, ang kapolisan wala magduhaduha sa pagsikop sa tulo ug gibalhog kini sa karsel sa lungsod sa Carmen.

Ang tulo mag-atubang og kasong kalapasan paghupot og ilegal nga drugas.  – BANAT NEWS