CEBU, Philippines - Samdan sa paa ang usa ka manager sa usa ka kompaniya human siya pusila sa armadong tulisan didto sa Barangay Subangdako, dakbayan sa Mandaue sa milabay’ng hapon.
Ang biktima mao si Jerremeah Garcia, 40, minyo, nga taga Ouano Avenue, sa dakbayan sa Mandaue ug manager sa usa ka kompaniya sa maong dakbayan.
Sumala sa kapolisan nga nagsakay ang biktima sa iyang motorsiklo nga nagsubay sa highway, pag-abot sa Subangdaku, kalit lang siyang gibabagan sa usa ka motorsiklo nga giluwanan sa duha ka wala hiilhing tawo kinsa mideklarar nga tulis.
Dungan sa paglabni sa iyang bag, gipusil ang biktima ug nasabak ang iyang paa ug gibiyaan siya sa mga tulisan.
Nadala ang iyang laptop, cell phone ug salapi nga wala pa hisayri ang kantidad ug padayon pang gipangita sa kapolisan ang mga tulisan. – BANAT NEWS