CEBU, Philippines - Usa ka 18-anyos nga lalaki gidakop kay gipasanginlan nga nanghinol og babaye nga naglangoylangoy sa dagat sa usa ka beach resort sa barangay Marigondon, dakbayan sa Lapulapu sa milabay’ng hapon. Ang gisikop mao si Dennis (tinuod nga ngalan gipugngan), 18, ulitawo ug residente sa sitio Cabantan, barangay Mabolo, dakbayan sa Sugbo.
Ang mireklamo usa ka Imelda (tinuod nga ngalan gipugngan usab), 18, dalaga ug residente sa sitio Duljo-Fatima, dakbayan sa Sugbo. Base sa reklamo ni Imelda nga mga alas 3 sa milabay’ng hapon samtang nalingaw siya og langoylangoy sa Marigondon beach kalit lamang gihakop ang iyang pribadong parte sa ubos nga bahin sa iyang lawas sa usa ka batan-ong lalaki hinungdan nga kini nagpakitabang sa iyang mga kaubanan sa pamilya.
Si Dennis gisikop sa kapolisan ug gidala sa Lapulapu Police Station ug giimbestigar.
Atol sa imbestigasyon, hugot nga gihimakak ni Dennis ang alegasyon ni Imelda. Sumala pa niya nga igo lang siyang naglangoylangoy sa dagat ug wala niya tuyoa nga mahikapan niya ang pribadong parte sa lawas ni Imelda.
Apan hugot nga mitumbok si Imelda nga gituyo ni Dennis ang paghakop sa iyang ubos nga bahin sa pribadong parte sa lawas ug gani nagkatawa pa kini human sa hitabo.
Gumikan niini, si Imelda andam nga mopasaka og kasong “acts of lasciviousness” batok kang Dennis gumikan sa paghinol sa pribadong parte sa lawas niini. (BANATNEWS)