Kapolisan sa Metro Cebu usahon - MCCI

CEBU, Philippines - Mga polis sa Metro Cebu giawhag nga hiusahon ug tawagong “Inter City Police Force” aron mas dali ang koordinasyon ug kasulbaran sa mga nagsunod-sunod nga krimeng nanghitabo.

Kini maoy gisugyot ni Mandaue Chamber of Commerce and Industry President Eric Mendoza atol sa regular press conference uban ni Mandaue City Mayor Jonas Cortes kagahapon sa buntag.

Matud pa ni Mendoza nabalaka ang kahugpungan sa mga negosyante sa dakbayan sa Mandaue gumikan sa sunodsunod nga pagpamanhig sa mga negosyante sa nanglabay’ng mga semana.

Si Mendoza misugyot nga kinahanglang usahon ang kapulisan sa Metro Cebu ug magtinabangay pagsulbad ug pagpuhag sa mga kriminal ilabi na ang mga gun-for-hires.

Naobserbaran ni Mendoza nga kung adunay panghitabo sa dakbayan sa Mandaue magtabok-tabok lamang ang mga responsable maong maglisod ang kapolisan sa paggukod kanila tungod sa isyu sa hurisdiksiyon. 

Sumala pa niini nga dali rang makakita og kataguan ang mga kriminal gumikan sa kahuyang sa intelligence network sa kapolisan, apan kun matukod ang Inter City Police Force dali lang ang operasyon bisan pa kung kini dili ilang hurisdiksiyon.

Gisuportahan ni Cortes ang maong sugyot apan kinahanglang makigsabot una kini sa mga Local Chief Executive (mga mayor) ug kadagkoan sa kapolisan.

Samtang si Antonio Dy, presidente sa Chinese Chamber of Commerce and Industry sa maong dakbayan misugyot nga kuhaon sila isip deputized agents sa kapolisan.

Sumala pa niya nga dako og ikatabang ang mga negosyante sa kakulangon sa mga sakop sa kapolisan ilabi na kadaghanan kanila adunay mga sakyanan ug makatabang sa pagpahigayon og pagpatrolya sa mga dapit.  - Bong Soriano ug Romeo Limpangog (BANAT NEWS)