CEBU, Philippines - Si Gobernador Gwen Garcia miangkon kagahapon nga ang kagamhanan sa lalawigan sa Sugbo nagdawatan usab og tunga sa milyon ka pesos nga pundo matag bulan gikan sa Philippine Gaming Corporation (PAGCOR).
Apan dili niya pugngan si Presidente Benigno Noynoy Aquino sa pagbaligya sa PAGCOR ngadto sa mga adunahang negosyante partikular na sa giingong Malaysia's "big boy."
Gihulagway sa gobernadora ang maong isyu nga usa ka "judgement call" alang kang Presidente Aquino sa pagpadayon sa plano niini sa paghimong pribado sa PAGCOR.
Matud pa ni Garcia nga misempatiya siya sa presidente sa kalisod sa iyang kahimtang karon isip presidente sa nasud ilabina nga nanginahanglan og igong pundo ang nasud alang sa pagbayad sa dakong utang niini ug gastohanan sa mga programa sa gobiyerno.
Gipasabot ni Garcia nga ang maong tunga sa milyon ka pesos nga pundo gikan sa PAGCOR maoy gigamit sa Kapitolyo sa pagpanghatag og hinabang financial ngadto sa mga biktima sa mga trahedya ug sa mga tambal alang sa mga pasyente sa kalungsoran nga nalandig sa Vicente Sotto Memorial Medical Center.
Ang gobernadora miingon nga bisan og maputol ang maong pundo, ang Kapitolyo makapadayon gihapon sa pagpanghatag og hinabang ngadto sa mga nanginahanglan, ug sa pagpatuman pa sa ubang mga proyekto sanglit ang probinsiya may igo pa mang pundo.
Apan giklaro sa gobernadora nga dili usab magpanuko sa pagdawat ang Kapitolyo sa maong ayuda gikan sa PAGCOR kun ipadayon gihapon kini og tanyag sa administrasyon ni Aquino. - BANAT NEWS