Alegado maoy nagbulgar sa NFA

CEBU, Philippines - Ang Sugboanong Presidente sa National Grains Retailers Confideration of the Philippines (GRECON) Teresita Alegado kinsa sa samang higayon mayor sa Consolacion,maoy usa sa naghatag og impormasiyon ni Presidente Benigno “Noynoy” Aquino sa naghinobrang importasyon sa bugas humay dinhi sa nasud nga nangalata na lang sa mga bodega sa National Food Authority (NFA).

Gibutyag ni Mayor Alegado nga niadtong milabay’ng kampanya sa miaging eleksiyon niadtong Mayo 10 iyang gibalik-balik ang panawagan ngadto sa gobyerno sa paghunong na sa naghinubrang importasyon sa bugas humay kay nangalata na kini gumikan sa kadaghan.

Unya iya kining gisulti ngadto kang Presidente Noynoy Aquino dihang miduaw kini dinhi sa Sugbo panahon sa kampanya ug gisaysay niya ang tanan bahin sa tagkapin nang tuig nga mga bugas diha sa bodega ug gumikan sa kakaraan na niini gipamaligya nalang og barato kay nangabaho na.

Busa nalipay kaayo siya dihang gilakip ni Presidente Aquino sa iyang State of the Nation Address(SONA) ang pagbutyag sa maong kahiwian nga bahin pa sa administrasyon ni kanhi Presidente Gloria Arroyo.

Si Alegado misaad nga kun gikinahanglang pamatud-an niya kini, andam siya sa tanang higayon kay dako kaayo siya og kasinatian niini.

Hinuon iyang gipadayag nga dinhi sa Sugbo igo-igo ra ang maong supply apan nakatabang kaayo sa mga kabus .

Si Alegado midaug sa pagka- mayor sa lungsod sa Consolacion ubos sa partido ni Presidente Aquino sa Liberal Party sa miaging eleksyon. - Darrel A. Carumba ug Chester Abadilla (BANAT NEWS)