Drayber sa trak misuborno sa Speed cop gisikop hinuon

CEBU, Philippines - Gisikop sa usa ka police traffic officer ang usa ka drayber human misulay og suburno kaniya sa dihang gisikop gumikan sa kalapasan sa lagda sa trapiko sa dalan M.L. Quezon Highway, barangay Ibo, dakbayan sa Lapulapu sa milabay’ng hapon.

Ang nasikop mao si Oscar Milia, 44, taga, Guizo, Mandaue ug drayber sa usa ka delivery truck.

Matud ni SPO1 Ismael Zerna, sakop sa speedcop sa Traffic Division sa Lapulapu City Police Office nga iyang namatikdan nga nag-overloading ang trak nga gimaneho ni Milia hinungdan nga iya kining gipara ug gisita.

Nasuta usab nga depektoso ang break light niini hinungdan nga iyang gihatagan si Milia og temporary operator’s permit (TOP).

Apan nakugang si SPO1 Zerna nga gitunolan siya og P100 ni Milia bugti sa pagkanselar sa giluwatang TOP.

Gumikan niini, gisikop si Milia ug gidala sa buhatan sa kapolisan ug gidetiner gumikan sa pagpanuborno.

Kasong paglapas sa lagda sa trapiko atubangon usab ni Milia lakip na ang kasong bribery.  – BANAT NEWS