CEBU, Philippines - Kritikal ang kahimtang sa magtiayon human pamusila samtang naglakaw sa libon nga lugar paingon nang mopauli sa sitio Butong barangay Cabasyangan lungsod sa Balamban niadtong Miyerkules sa alas 9:00 sa gabii.
Ang biktima mao si Rosemarie ug Gil Quohitmengaw, molupyo sa barangay Ginatilan, Balamban samtang ang suspek mao si Jesus Noya, molupyo sa sitio Butong barangay Cabasyangan, nga usa ka mag-uuma.
Si Rosemarie naigo sa iyang tuong bahin sa lawas samtang ang bana nga si Gil naigo sa bukobuko nga nilapos ang bala sa dughan.
Matud ni PO1 Alvy Agua sa Balamban Police dihang nahinabi sa Banat News ang mga biktima gikan sa barangay Lusaran bukirang bahin sakop na sa siyudad sa Sugbo.
Apan dihang namauli na kini nga naglakaw pag-abot sa nahisgutang lugar sa libon nga dapit kalit silang gipamusil sa suspek.
Matod sa report si Rosemarie bisan ug samaron nakadagan pa kini ug nagsinggit-singgit pagpangayo og tabang samtang ang iyang bana nalup-og hinungdan nga nahadlok ang suspek ug misibat pahilayo.
Ang mga biktima gidala sa Vicente Sotto Memorial Medical Center (VSMMC) dinhi sa dakbayan sa Sugbo ug sa paghimo ning balita anaa pa sa talandugon nga kahimtang.
Wala pa matino sa kapolisan ang motibo sa maong krimen. – BANAT NEWS