CEBU, Philippines - Kasong rape ug homicide ang gipasaka kagahapon batok sa usa ka helper sa junkshop kinsa miangkong siyay milugos ug mipatay pinaagi sa pagmaso sa ulo sa kauban niyang maid sa junk shop nga iyang gitrabahoan.
Kini ang nasayran sa Banat News kang PO3 Roberto Neri sa Investigation Detection and Management Bureau (IDMB) sa Mandaue City Police Office (MCPO) sa follow up nga gihimo kagahapon kinsa miila kang Remelito Serognas, lumad nga taga Asturias ug helper sa junkshop nga nahimutang sa barangay Basak, dakbayan sa Mandaue nga maoy suspetsado.
Ang biktima nga iyang gilugos ug gipatay mao si Rowena Rodrigo, lumad nga taga Tabogon, amihanang lungsod sa Sugbo ug nagtrabaho isip maid sa junkshop nga gitrabahoan sa suspetsado.
Ang biktima didto ra lugosa ug patya sa sulod sa lawak nga katulganan niini .
Ang suspetsado miangkon nga human niya lugosa ang biktima iya kining gipatay kay mibahad kining mosumbong sa ilang amo.
Misibat dayon siya human sa hitabo apan nadakpan siya sa kapolisan didto sa ilang lungsod sa Asturias. (BANATNEWS)