CEBU, Philippines - Nalandig sa tambalanan ang hepe sa tanod sa barangay Balungag, lungsod sa San Fernando human kini pusila sa wala mailhing lalaking nagsakay og motorsiklo kagahapon sa kaadlawon.
Si Carlito Obial, 48-anyos, nakaangkon og samad pinusilan sa tiyan daling gidala ngadto sa Vicente Sotto Memorial Medical Center.
Si PO3 Marjukin Misuari sa San Fernando Police Station sa pakighinabi niini sa Banat News kagahapon nagkanayon nga ang kapitan sa nahisgutang barangay nga si Rolando Barolo maoy mi-report diha sa ilang buhatan kabahin sa insidente.
Ang grupo ni SPO2 Victor Cuyno daling miresponde sa nahisgutang taho ug base sa ilang pasiunang imbestigasyon si Obial uban sa duha ka tanod nga sila si Cosme Sato ug Leonardo Siarat ug usa ka molupyo nga si Aresteo Mangcao gikan mitan-aw og awarding ceremony diha sa basketball court sa ilang dapit naglakaw paingon na untang mouli.
Usa ka wala mailhing lalaki kinsa nagsakay og Honda Wave nga kolor blue nga motorsiklo ang kalit lang mitungha ug dayon mipusil ngadto kang Obial.
Human sa pagpamusil daling mipadagan sa iyang motorsiklo ang nahisgutang lalaki pahilayo sa lugar.
Kasamtangan pang nagpadayon ang imbestigasyon sa maong insidente aron mailhan ug mahibaw-an ang motibo sa krimen. - BANAT NEWS