Gipusil samtang nangihi

CEBU, Philippines - Samdan sa dughan ang usa ka tawo human kini pusila sa wala hiilhing criminal samtang nangihi didto sa Deca Homes subdivision sa barangay Bangkal, dakbayan sa Lapulapu sa miaging gabii.

Ang biktima mao si Celso Villarde, 20, ulitawo, lumad nga taga Mantalongon , lungsod sa Dalaguete, ug usa ka stay-in worker ni Fire Marshall   Ricardo Cornelio sa maong dakbayan.

Si PO3 Dioscoro Arong sa Crime Against Person sa Lapulapu Police Station mibutyag sa Banat News nga samtang ang biktima nangihi , giduol kini sa usa ka wala hiilhing lalaki ug kalit kining gipusil.

Human masabak sa walang dughan ang biktima, misibat dayon ang kriminal pahilayo sa maong lugar.

Ang biktima gihatod usab dayon sa mga tagtungod ngadto sa Vicente Sotto Memorial Medical Center sa dakbayan sa Sugbo.

Gipangita pa sa kapolisan ang kriminal. (BANAT NEWS)