CEBU, Philippines - Pormal nang miasumer ang bag-ong Base Commander sa Mactan Benito Ebuen Air Base ( MBEAB ) human pormal nang gitugyan ni 560th Air Base Wing (ABW) Commander Brig. Gen. Edgardo Mendoza ang iyang katungdanan ngadto ni Colonel Raul Dimatatac ang pagdumala sa maong base militar nga anaa sa dakbayan sa Lapulapu.
Si Mendoza sud sa 33 ka tuig na nga nagserbisyo ug miretiro sa katungdanan sa milabay’ng semana atol sa iyang pagsaulog sa ika-56th nga kasumaran sa iyang adlaw’ng natawhan.
Ang mihulip kaniya nga si Dimatatac gikan sa Special Operations Wing (SPOW) nga nagbase sa Clark Air Base sa Pampanga ug mao nay bag-ong Base Commander sa MBEAB isip bag-ong 560th ABW Commander.
Atol sa “Testimonial Review ug Change of Command Ceremony” si PAF Commanding General Lt. Gen. Oscar Rabena maoy nangunay sa pagtugyan sa bag-ong katungdanan ngadto ni Dimatatac.
Si Mendoza atol sa iyang pagpanamilit mipasalamat sa mga sakop sa pag-abag kaniya sulod sa 33 ka tuig.
Samtang si Dimatatac mipasalig nga ipadayon niini ang mga maayong nasugdan ni Mendoza ug ipabilin nga taas ang integridad sa ginsakupan ug pagpadayon sa pakig-alayon sa komunidad. - BANAT NEWS