CEBU, Philippines - Namatay pipila ka gutlo sulod sa tambalanan ang usa ka lalaking gipukaw dayon gipusil sa wala mailhing mga lalaki diha sa sitio Mahayahay sa barangay Bankal dakbayan sa Lapulapu kagahapon sa kaadlawon.
Ang biktima mao si Gerson Castillo, lumad sa barangay Ulas dakbayan sa Davao ug kasamtangang nagpuyo sa maong dapit.
Base sa pasiunang imbestigasyon ni PO1 Maximo Villagonzalo sa Crime Against Persons Desk nasayran nga mga ala 1:30 kagahapon sa kaadlawon gisulod og tulo ka wala mailhing lalaki ang balay ni Castillo.
Ang maong mga lalaki gikatahong luwan sa usa ka motorsiklo ug pag-abot mipasalba sa ilang armas kini aron pukawon sa pagkatulog si Castillo hinungdan nga migawas ang naulahi tungod sa buto sa armas.
Gikatahong miadto si Castillo sa gym apan kalit nga mibutho ang motorsiklo ug ang mga nangangkas nanganaog ug mipaulan og bala sa biktima.
Si Castillo nga naigo sa ulo gidali og dala sa mga sakop sa Emergency Rescue Unit Foundation ngadto sa Vicente Sotto Memorial Medical Center apan pipila ka gutlo nakabsan kini sa iyang kinabuhi.
Ang kapolisan sa pagresponde sa maong dapit pakyas sa pagsikop sa tulo ka mga gikatahapan nga daling nangikyas luwan sa motorsiklo.
Wala pay matumbok ang kapolisan kun si kinsa ang maong mga mamumuno ingon man ang ilang motibo sa pagpamusil. (BANATNEWS)