Nag -wild gipusil sa polis

CEBU, Philippines - Usa ka lalaking nag-wild gumikan sa kahubog ug nakadunggab sa silingan ang napusilan sa duha ka bitiis sa mirespondeng mga polis dihang dakpon unta kini apan giingong misuway og dunggab sa mga polis nga modakop kaniya niadtong Domingo sa kaadlawon diha sa Sudlon, sa barangay Lahug ning dakbayan.

Si Sr. Supt. Patrocinio Comendador, ang city director sa Cebu City Police Office miila sa napusilang hubog mao si Antonio Teves nga molupyo sa maong lugar kinsa nalandig sa tambalanan human mapusili ni PO2 Romeo Caacoy Jr. sakop sa Mobile Patrol Group (MPG).

Matud pa ni Comendador si Teves napusilan sa duha ka batiis sa maong polis gamit ang service firearm nga .38 revolver.

Nagkanayon si Comendador nga sa wala pa mapusili si Teves giingong nag-wild kini pasado alas-10 sa gabii niadtong Sabado sa iya ra usab mga silingan ug nagdala-dala og kutsilyo, usa sa mga silingan niini ang giingong nadunggaban.

Tungod niini daling miresponde sa maong dapit ang MPG nga gipangulohan ni PO2 Romeo Caacoy Jr., PO2 Mark Betanio, PO1 Herbert Solon ug PO1 Wilfredo Casas.

Matud ni Comendador nakit-an sa miresponding polis si Teves nianang pasado ala-una na sa kaadlawon niana nang Domingo nga nagdala gihapon og kutsilyo maong kini gisitar.

Apan giingong misuway hinuon kini og dasmag sa mga polis hinungdan napugos si PO2 Caacoy sa pagpusil kaniya diha sa batiis aron sa pagpakalma niini.

Si Comendador daling midepensa sa iyang sakop ug nagkanayon nga usa ka lehitimong operasyon ang gihimo ni PO2 Caacoy ug mga kaubanan sanglit niadtong higayona nameligro ang ilang kinabuhi tungod kay armado si Teves.

Matud ni Comendador kagahapon, posibleng mokiha pa ang nadunggaban ni Teves nga iyang silingan kansang pangalan wala usab mabutyag sa kapolisan.

Si Teves gikatahong dunay nervous breakdown sumala pa sa report.

Kasong physical injuries ug direct assault ang ipasakang kaso sa kapolisan batok ni Teves kinsa natanggong na karon sa karsel sa kapolisan sa dakbayan sa Sugbu.   (BANATNEWS)