CEBU, Philippines - Patay ang usa ka heavy equipment operator human mobuto ang ligid sa iyang gimanehong crane ug napunggit ang ulo niini kagahapon sa buntag sulod sa ilang motor pool area sa sitio Sun-ok sa barangay Tayud sa Consolacion.
Si SPO2 Arnold Omaña sa Consolacion miila sa biktima nga mao si Elemer Baquerquer, 38, taga barangay Tabunok sa lungsod sa Tabuelan ug nagtrabaho sa CST Engineers and Builders nga nagbase sa maong dapit.
Matud pang Omaña sa pakighinabi sa Banat News nga na-flat ang ligid sa crane nga gimaneho ni Baquerquer maong gidugangan niya kini og hangin gamit ang compressor.
Gikatahong mismong ang mga kaubanan niini daan nang mipasidaan kaniya nga dili mokumpiyansa kun magdugang og hangin sa ligid ilabi na kun kini nakakabit pa sa sakyanan gumikan kay mobuto.
Samtang nagkarga og hangin sa ligid ang biktima gikatahong nalagpot ang lock sa ring sa ligid nga nagpugong niini, gumikan sa kakusog sa pressure sa hangin milupad ang ring ug didto naigo sa ulo ni Baquerquer.
“Kusog kaayo ang impact kay napusa man ang iyang ulo,” matud pa ni Omaña.
Ang biktima patay diha-diha. Matud pang Omaña ang tag-iya sa maong kompanya mipasalig og hinabang ug suporta sa nabiyuda ug tulo ka mga anak ni Baquerquer. (BANATNEWS)