Tungod sa kandidato magtiayon nagbuwag

CEBU, Philippines - Gumikan sa managlahing baroganan bahin sa nagustohang kandidato, usa ka magtiayon nagkabuwag og usa ka gabii, samtang angol ang usa ka 60 anyos nga inahan dihang gibugno ug gikulata sa iyang anak kay pulos wala magkasabot sa botohan nilang kandidato sa managlahing lugar ning dakbayan niadtong Domingo sa hapon, bisperas sa election.

Ang magtiayong nagkabuwag og usa ka gabii mao si Boy ug Delia (dili tinuod nilang ngalan), pulos hamtong nga nagpuyo sa barangay Banawa, dakbayan sa Sugbo.

Samtang ang inahan nga nabun-og kay gikulata sa iyang anak babaye mao si Eleuteria (dili usab tinuod nga ngalan) samtang ang iyang anak mao si Juliet, nga pulos nagpuyo sa barangay Quiot, ning dakbayan sa Sugbo.

Si Boy mitug-an sa Banat News nga gibiyaan niya ang iyang asawa niadtong Domingo kay nag-away sila bahin sa kandidato nga ilang gibotohan.

Matud pa ni Boy nga bisan giunsa niya pagpasabot ang iyang asawa nga si Gibo gyu’y ilang botohan, midumili gyud si Delia, kay didto kini mopabor kang Villar.

Gumikan sa iyang (Boy) kasuko, miyarok siya og pila ka botelyang bino ug mihiwasa unya aron dili siya makasala sa iyang asawa didto siya mohigda sa iyang trabahoan.

Samtang si Eleuteria, nagtibi nga misumbong sa Banat News nga gikulata siya ug gibun-og ug gihinginlan sa iyang anak nga babaye kay nasuko nga mibotar siya kang Gibo.

Kini tungod kay ang iyang anak didto mopabor kang Noynoy. Mikagiw ang maong inahan ug didto na motipon sa lain niyang anak.

Gumikan kay ika-uwaw nila nga hinganlan sila sa balita gitago lang sa Banat News ang ilang mga tinuod nga ngalan agi og pagtahod sa ilang katungod. (BANATNEWS)