Noynoy mitagak ni Binay, miinsister si Mar iyang VP

CEBU, Philippines - Gi-junk ni Liberal Party standard bearer Sen. Benigno “Noynoy” Aquino III si Makati City Mayor Jejomar Binay ug miklarong iyang gipawalay-bili ang nabuhian niyang unang pagpanghaylo ngadto sa mayor sa higayon nga siya modaog ug miinsister nga si Sen. Mar Roxas lamang maoy iyang paluyohan.

“I am no longer confident that the good mayor and I share a common vision and therefore the past offer then is no longer valid,” pasabot pang Aquino.

Makita karon ang pag-insister ni Aquino sa mga political advertisements sa telebisyon nga miklarong bugtong si Sen. Mar Roxas lamang maoy iyang suportahan. Sumala pang Aquino iyang gitanyagan kaniadto si Binay og luna sa senatorial slate o ba kaha kuhaon niya kining sakop sa kabinete ilabi na sa Department of Interior and Local Government aron kini kombinsiron nga suportahan ilang kandidatora ni Sen. Mar Roxas.

Kahinumduman nga si Roxas midesisyong di ipadayon ang pagkandidato pagka-presidente ug gihatag kini ngadto kang Aquino gumikan sa gipakitang suporta sa mga tawo kang Noynoy atol sa pagtaliwan sa inahan niining si kanhi presidente Corazon Aquino.

Si Binay mao karoy ka-tandem ni kanhi presidente Joseph Estrada sa Partido ng Masang Pilipino human wala makasulod sa senatorial slate sa LP.

Ang Aquino-Roxas tandem mao karoy nag-una sa mga surveys nga namantala bisan paman sa mga gihulagway nilang ‘black propaganda’ sa ilang mga kaatbang. Lakip si Sen. Francis Chiz Escudero miendorsar kang Binay ug nagtinguhang makuha ang suporta sa mga tigpaluyo ni Noynoy pabor kang Binay sa pagka-bise presidente.

Apan gipapas karon ni Aquino ang maong pagduda ug mipadayag nga si Roxas lamang mao iyang kandidato sa pagka-bise presidente ug dako ang pagsalig nga loyal kining kapartner alang sa limpyo ug matinud-anong panggobiyerno.

Miinsister ni Aquino nga magpabiling si Roxas maoy iyang bise presidente bisan paman sa giingong pagpakatap og estorya sa kampo ni Binay nga suportado sila ni Aquino. – BANAT NEWS