Sakop sa akrho gibulit og dunggab

CEBU, Philippines - Naglunang sa kaugalingong dugo ang usa ka gituohang miyembro sa Alpha Kappa Rho human maputos og samad dinunggaban pasado alas-10 sa buntag sa sitio Ipil-Ipil barangay Alaska-Mambaling ning dakbayan.

Si Burce Baker Adlawan, 25, taga sitio Calero barangay Tinago nakaangkon og di mominos napulo ka mga samad dinunggaban sa nagkadaiyang parte sa iyang lawas.

Sa pakighinabi sa Banat News ni SPO4 Alex Dacua ang imbestigador sa homicide section mibutyag nga naputos og samad dinunggaban ang biktima ginamit ang “tres-cantos” nga klase sa hinagiban.

 Base sa mga dinunggaban nakita nga daw gitabangan pagdunggab ang biktima.

Dugang pa ni Dacua base usab sa ilang nakaylap nga impormasyon katapusang nakit-an ang biktima kuyog sa usa ka “Balo” nga giingong notadong kawatan sa maong barangay.

Walay nakuhang makatabang nga impormasyon ang kapolisan diha sa crime scene tungod kay nangahadlok ang mga tawo. Nakuha sa bulsa sa biktima ang nagkadaiyang klase sa mga identification cards diin lain usab ang mga ngalan niini nga maoy gikatingala sa kapolisan. – BANAT NEWS