CEBU, Philippines - Gihangop sa mga molupyo sa Greenhills Homeowners Association (GHA) sa barangay Casuntingan siyudad sa Mandaue ang pagpasemento ni Kongresista Nerissa Soon Ruiz sa karsada sa maong lugar nga sulod sa dugay nang mga katuigan wala maatiman sa kagamhanan sa siyudad sa Mandaue.
Ang presidente sa GHA nga si Raul Lumapas mibutyag kagahapon sa Banat News nga karon pa makonkreto sa hingpit ang ilang karsada nga gipakapinan pa sa pagtukod og club house ni kongresista Ruiz.
Ang maong proyekto gigahinan sa kongresista og P1 milyon alang sa phase l nga gibana- banang may gitas-ong 170 metros.
Si Lumapas mibutyag nga dugay nang panahon nga gipangandoy nila nga mapasemento ang karsada sa ilang lugar ug daghan nang higayon nga nangayo sila niini sa kagamhanan sa dakbayan apan wala gayud sila tagda.
Gibana -banang mokabat na og P15.5 milyones ang kinatibuk-ang gahin gikan sa pork barrel sa kongresista nga nagasto sa mga proyektong pagpasemento sa mga kadalanan sa dakbayan sa Mandaue. Lakip nga napasemento mao ang karsada sa Dona Rosario Village ug Maria Antonia Village nga pulos sa barangay Labogon, Mango Green Subdivision sa Banilad ug San Jose Village road sa Umapad. (BANATNEWS)