CEBU, Philippines - Gibasura sa korte ang kasong smuggling nga gipasaka batok sa magpapatigayon ug mayoralty candidate sa lungsod sa Tuburan Democrito ‘Aljun’ Diamante Jr.
Si Presiding Judge Toribio Quiwag sa Lapulapu Regional Trial Court branch 27 nipakanaug sa desisyon nga nagbasura sa kaso batok ni Diamante niadtong petsa 15 ning buwana human masuta sa korte nga way lig-ong ebidensiya nga nagsuporta batok sa maong aligasyun.
Atol sa press conference gipadayag ni Atty. Rico Amores, abogado ni Diamante nga bisan ang state witnesss nga si Prospero Booc, kanhi kawani sa Bureau of Customs ang wala gyud makaila kang Diamante atol sa tulo ka mga nilabay’ng hearing nga gipatawag sa korte.
Si Diamante gipasakaan og kasong smuggling sa Bureau of Customs niadtong tuig 2000 dihang nagsilbi pa kining manager sa Target Airfreight and Forwarding Company human mabulgar ang gipalusot nga P7 milyones nga balor sa mga relo gikan sa Hongkong nga gi-declare sa mga dokumento nga electrical parts.
Apan gipasabot ni Diamante nga gi-apil siya sa pagpasaka og kaso tungod kay siya man ang manager sa maong forwarding company bisan og ang mga examiner ang dunay katungod nga mohiling sa mga kargamento.
Hinuon nagpasalamat si Diamante nga gihimong black propaganda sa iyang mga kaatbang sa politika ang mao niyang kaso nga ilaha nang nakalimtan ug napasagdan tungod kay naklaro hinuong dili siya sad-an.
Si Amores nagkanayon nga fall guy lamang ang iyang kliyente ug biktima sa inhustisya. Ang prosecution dunay star witness nga si Prospero Booc, 43, nga giingong nagtrabaho sa BOC diha sa Lapulapu.
“In the case at bar, the prosecution failed to prove the elements of the crimes charged. It even failed to identify the accused. Suffice it to say, there is no sufficient evidence to support conviction of the accused,” sumala pa sa desisyon una pa gi-dismiss ang kaso.
Dugang ni Diamante nga gisakyan dayun unta sa iyang mga kaatbang sa politika ang maong kaso apan sila ray napakyas pagguba kaniya. (BANATNEWS)