Bakol Nga 12-Anyos Gi-Rape

CEBU, Philippines – Usa ka batang babayeng bakol nga nagpangidaron og 12-anyos gipahimuslan sa usa ka lalaki sa makadaghang higayon sa sitio Aroma, barangay Subangdaku, siyudad sa Mandaue.

Ang bata molupyo sa maong lugar usa ka biktima sa polio.

Samtang ang gipasanginlan nga nagpahimulos kaniya giila sa kapolisan nga si Rio Brigole, 24, kasamtangan nga nagpuyo sa maong lugar ug lumad nga taga barangay Poblacion, lungsod sa Sogod ug usa ka construction worker.

Sa pakighinabi sa Banat News sa usa ka polis nga nagdumili pagpaila mibutyag nga niadtong Abril 2 midangop sa ilang buhatan ang inahan sa bata ug misumbong nga ang iyang anak gipahimuslan ni Brigole.

Matud pa sa inahan sa bata nga ang iyang anak wala na makatingog ug mibula ang baba ug sa dihang gisusi ang kinatawo niini, nakita sa inahan nga midako kini.

Dugang pa sa maong polis nga niadtong Abril 3, ang amahan sa biktima mibutyag nga mitingog na ang iyang anak ug mitug-an ang bata nga gipahimuslan siya ni Brigoli makadaghang higayon.

Apan ang polis mipasabot sa amahan nga dili sila makadali-dali og sikop kang Brigoli tungod kay dugay na nga nahitabo ang pagpanamastamas. Apan ang amahan mihangyo sa polis nga siya na lang ang mosikop ug asistihan na lang siya sa kapolisan.

Tuod man ang amahan sa biktima uban sa duha ka higala niini daling miadto sa lungsod diin nagpuyo si Brigoli ug didto ilang nakit-an hinungdan nga gidala sa amahan sa biktima ngadto sa mga polis nga mi-asister niini.

Mibutyag usab ang polis nga sa gipahigayon nga eksaminasyon sa nahitabo sa bata sa Vicente Sotto Memorial Medical Center, nasuta nga katulo ngadto sa kaupat ka higayon nga gipahimuslan ang bata.

Samtang nasayran usab nga si Brigoli nag-abot ra diay sa panimalay sa biktima diin taymingon niini nga molakaw ang ginikanan sa biktima mao usab ang higayon nga iyang pahimuslan ang bakol.

Kasong rape maoy ipasaka batok ni Brigoli nga nagtingkagol karon sa karsel sa Mandaue City Police Office Station 2. (BANAT NEWS)