CEBU, Philippines - Usa ka maestra sa Taloot Elementary School sa lungsod sa Argao ang gireklamo sa usa ka ginikanan human giingong misunog ug migisi-gisi sa mga notebook ug project sa iyang mga tinun-an human wala makauyon nga hugaw ang iyang classroom.
Ang maestrang gireklamo nagtudlo sa Taloot Elementary school ug usa ka adviser sa grade 3 samtang ang inahan nga mireklamo nagpaila lang sa ngalan nga Lina.
Ang Banat News nakadawat og reklamo pinaagi sa usa ka text message nga nagkanayon nga ang iyang anak naguol nga miuli tungod kay ang notebook ug project gisunog sa maestra.
Sa pakighinabi sa Banat News sa anak ni Lina nga nagpangidaron og 10-anyos mibutyag kining sa miaging adlaw gipahimangnoan sila sa ilang maestra nga dad-on ang tanang notebook ug project aron ma-check.
Kagahapong adlawa ang 10-anyos uban sa iyang igsuong iya ra usab nga classmate nagdala sa ilang mga notebook ug projects apan tungod kay dugay naabot ang magtutudlo ilaha nalang kining gibilin sa lamesa niini.
Mao nalay ilang nahibaw-an nga gigisi kini sa ilang mga classmate ug taga laing section subay sa gimando sa ilang maestra tungod kay nasuko kining hugaw ang ilang classroom. Ang bata mibutyag nga saputon ang ilang maestra ug dunay higayong mipa- ‘sit-on the air’ sa usa sa iyang classmate, ug manglabay usab kini og sandals.
Misuway pagkuha ang Banat News sa habig sa maong tunghaan apan wala nay mitubag sa ilang telepono. (BANATNEWS)