CEBU, Philippines - Namatay dihadiha ang usa ka motorista dihang nadasmag sa gutter sa karsada ang iyang motorsiklo didto sa Maximo Patalingjug Avenue sa sitio Humay-Humay sa barangay Pajo, dakbayan sa Lapulapu sa miaging hapon.
Ang biktima kinsa nabalibali ang kalawasan gisuwayan sa kapolisan paghatod ngadto sa Lapulapu District Hospital diin kini gideklarar nga dead on arrival.
Si SPO2 Ruel Nalzaro sa traffic section sa kapolisan sa maong dakbayan mibutyag sa Banat News nga gikan pa sa dakbayan sa Mandaue ang biktima nga nagpabaguros sa iyang motorsiklo dihang pag-abot niini sa Maximo Patalingjug Avenue kalit lang nabag-id ang ligid sa iyang motorsiklo sa gutter sa karsada busa mibaliwliw ang motor hangtod nga napantok ang ulo niini sa sementadong karsada.
Giila ang biktima nga mao si Melchor Abeneles, 34.
Gisuta pa sa kapolisan ang hinungdan sa pagkadasmag sa motorsiklo sa biktima sa gutter sa karsada. – BANAT NEWS