CEBU, Philippines - Karung adlawa hingpit nang makompleto ang kinatibuk-ang 60 megawatts nga supply sa kuryente sa Mahalagdong Geothermal Power Plant nga magsuplay og kuryente sa Visayas Grid.
Kagahapong adlawa unang nahibalik ang 30 megawatts nga supply sa kuryente gikan sa maong power plant ug ang dugang 30 megawatts ang idugang niini karung adlawa.
Ang tigpamaba sa National Grid Corporation of the Philippines (NGCP) nga si Belinda Canlas nagkanayon nga gipaabot nga maminus-minusan na ang pagkuwang sa supply sa kuryente dinhi sa Sugbu tungod sa pag-operate og balik sa maong power plant sa Leyte. Ang Mahalagdong Power Plant, mihunong pag-supply og kuryente sa milabay’ng duha ka semana tungod sa gipahigayong preventive maintenance sugod niadtong Enero 30.
Matud sa labaw sa NGCP nga si Raul Galano nga dako kaayo og matabang ang maong planta sa pagpaminus sa nasinati karun nga pagkuwang sa supply sa kuryente dinhi sa Sugbu. Sa pagka karun ang Visayan Electric Company (Veco) padayong mipatuman og rotation brownout sa mga konsumidor niini sa dakbayan ug Metro Cebu aron kaminus-minusan ang epekto sa kakuwang sa supply sa koryente dinhi.
Ang Sugbu nagkuwang og dili mominus sa 200 ka megawatts nga supply sa kuryente dihang misugod kini og supply og koryente kagahapon sa buntag.
Gitino hinuon niini nga may masinati gihapong mga brownouts dinhi sa Sugbu ug sa tibuok Visayas tungod kay kulang pa og 200 megawatts ang power supply ang gikinahanglanon sa rehiyon. - Rey Pasaporte ug Chester Abadilla (BANAT NEWS)