CEBU, Philippines - Gipasalig kagahapon sa mga opisyal sa Social Security System (SSS) dinhi sa dakbayan sa Sugbo nga ikahatag na nila ang maayong serbisyo sa tanan nilang miyembro diha sa bag-o nilang buhatan karon, ang nagbuntaog nga SSS building sa dalan Osmeña Boulevard ning siyudad.
Kini ang gibutyag sa branch manager sa SSS Mario Corro ning dakbayan kinsa nagkanayon nga nagsugod ang ilang pagpanawat sa ilang mga kliyente diha sa bag-o nilang buhatan niadtong adlawng Lunes.
Matud pa ni Corro nga sa maong adlaw, gisubhan usab nila ang bag-o nilang edipisyo ug ang tanang transaksyon anha na nila atimana sa maong lugar.
Iyang giawhag ang tanan nilang kliyente , nga dili na sila moadto pa sa gibiyaan nilang buhatan sa eskina sa Gorordo Avenue ug Escario ning syudad kay wala nay moatiman kanila didto.
Matud pa ni Corro nga hamugaway na kaayo ang pagtagad nila sa ilang mga kliyente diha sa bag-o nilang buhatan karon tungod sa kadako sa espasyo niini.
Lahi sa gibiyaan nilang buhatan sa Gorordo ug Escario nga maghuot ug magpila intawon ang mga kliyente nila didto nga makaluluoy kaayong sud-ongon kaniadto, dugang pa niya.
Miingon si Corro nga karong anaa na sila sa bag-o nilang opisina , mas paspas na ang ilang serbisyo ngadto sa katawhan tungod sa kaluag sa ilang panlihoklihok ug sa kakompleto usab sa mga kahimanan niini. (Chester Abadilla) (BANATNEWS)