CEBU, Philippines - Magtiayon nga bag-ohay lang nagpuyo sa syudad sa Danao gisulod sa duha ka tawo ug gipaulanan og bala nga miresulta sa kamatayon sa bana pasado alas onse sa milabay'ng gabii sa sitio Bogho barangay Sandayong Sur.
Ang namatay mao si Guillermo Mulato, 30, samtang gipangita pa karon sa kapolisan ang asawa niini nga si Jenny Mulato, 26, nga giingong naigo sa iyang kamot.
Sumala pa ni SPO4 Jose Salingua Jr. sa Danao Police Station dihang gikahinabi sa Banat News nga ang magtiayon natulog niadtong tungura sa ilang payag nga ginama lang sa sako dihang nahitabo ang pagpamusil.
Giingong duha ka mga wala mailhing lalaking nagsakay og motorsiklo ang mihunong sa tungod ug nanulod sa payag sa magtiayon ug kalit nga mipaulan og bala sa mga biktima.
Si Jenny, bisan paman sa pagkaigo sa iyang kamot dali kining nakadagan palayo ug nangayo og tabang sa kapolisan.
Patay diha-diha dayun ang bana ni Jenny tungod sa samad pinusilan sa nawong nga milapos sa luyong bahin sa ulo ug walang bahin sa bukton niini.
Nagduda si Salingua nga posibleng atraso ang hinungdan sa pagpamusil apan ila pang gipaabot ang kapikas sa namatay aron mohatag og dugang pamahayag.
Nasayran nga wala pay duha ka bulan nga nagpuyo sa maong barangay ang magtiayon, giingong gikan sa lungsod sa Carmen ang duha una pa mibalhin sa Danao. – BANAT NEWS