CEBU, Philippines - Pormal nang milingkod isip regional director sa National Police Commission (NAPOLCOM) si Atty. Homer Mariano Cabaral, maoy kanhi assistant regional director sa nahisgutang ahensiya sa milabay’ng duha na ka tuig.
Si Cabaral gibalhin kaniadto Region 10 kon CARAGA region ug isip director sa Napolcom didto, si Cabaral mibalik dinhi ug maoy gihulip sa miretirong si director Bernardo Calibo.
Niadto pang Disyembre 8, 2009 si Calibo miretiro sa iyang katungdanan.
Si Cabaral nga nahinabi sa Banat News nagkanayon nga padayonon niya ang nasugdan ni Calibo sa paglimpiyo sa organisasyon ug pag-professionalized sa kapolisan ug paglikay nga ang ahensya maapil sa kontroberisya.
Matud niini nga iyang paningkamutan ang tanang mga improvement alang sa kaayohan sa kapolisan dinhi sa rehiyon lakip na ang higpit nga implementasyon sa Akta Republika 9708 nga nagkanayon “an institution of a criminal action or complaint against a police officer shall not be a bar to promotion.”
Ang ahensya mipasar sa maong balaudnon aron matabangan ang mga polis kinsa dunay mga kasong giatubang gumikan sa pagtuman sa ilang trabaho nga nakaingon sa pagkabalda sa ilang promosyon.
Matud ni Cabaral nga tataw kaayong ang uban niini mga kasuhana’g ‘harassment cases’ aron lang makabawos sa mga polis.
Si assistant regional director Ramon Raneses ang mitunol ngadto kang Cabaral sa Office Symbol human sa Santos nga Misa diha sa ilang buhatan. (Brenda Batuto) BANATNEWS)