CEBU, Philippines - Bisan pa man sa taligsik kagahapon sa kaadlawon, liboan lang gihapon ka mga debotos ang midagsa sa gipahigayon nga Walk with Mary ug Misa de Traslacion kagahapon nga gisugdan pasado alas kwatro nga naggikan sa Fuente Osmeña paingon sa Basilica del Santo Niño.
Sa gipahigayon nga misa de traslacion si Msgr. Cristobal Garcia, labaw sa Commission on Worship sa Artsidyosesis sa Sugbo mipasumbingay kabahin sa ka-importante sa pamilya diin ang Pista Senyor maoy usa sa mga basehan nga magkahiusa ang pamilya.
Gihulagway ni Msgr. Garcia nga panahon na sa katawhan nga magpakabana sa importansya sa pamilya ilabi na sa kinabuhi sa tawo nga gikinahanglan panalipdan gikan sa sinugdanan hangtod sa katapusang kinabuhi niini.
Dugang pa ni Msgr. Garcia nga ang katawhan usab gikinahanglan nga magpakabana sa ilang isig ka tawo pinaagi sa pagkamabinantayon niini, sa pagpreserbar sa kalikupan ug paghatag og hugot nga pagtuo sa Labaw’ng Makagagahum.
Mipasumbingay usab si Garcia sa katawhan kabahin sa umaabot nga piniliay nga human na mipahimangno ang simbahan.
“Ang simbahan misulti na, anaa ra kanato kun maminaw ba ta,” pasabot pa ni Msgr. Garcia. Ang Simbahang Katoliko nag-awhag sa publiko pagpili sa mga kandidato nga wala magsuporta sa Reproductive Health Bill nga gitumong paglegalisar sa abortion.
Si Chief Insp. Aureo Sanchez, ground commander sa gihimong Walk with Mary, nagkanayon nga iyang gikonsiderar nga generally peaceful ang okasyon tungod kay walay mga panghitabo nga nakaapekto niini.
Gibanabana usab ni Sanchez nga dili mominos 20 ngadto sa 30 mil ang gidaghanon sa mga debotos nga mitambong sa Walk with Mary ug sa Misa de Traslacion diin iyang gihulagway nga wala kini kalahi-an sa Walk for Jesus. - Lesley Caminade (BANAT NEWS)