13 pamilya mopalarot sa balay

CEBU, Philippines - Mga tag-iya sa 13 ka mga balay sa barangay Tubod, lungsod sa San Fernando nagpatabang sa lokal nga kagamhanan nga ipalarot ang ilang mga balay aron mabalhin sa mas luwas nga dapit.

Si Eva Pelimer, staff sa buhatan sa mayor sa lungsod sa pakighinabi niini sa Banat News kagahapon mibutyag nga niadtong Miyerkules sa gabii lima ka barangay sa lungsod ang midahili ang yuta tungod sa uwan nga dala sa bagyong Urduja apan walay gikatahong mga naangol sa insidente.

Ang mga naapektohang barangay mao ang mga bukirang barangay sa Tubod, Ilaya, Tinubdan, Balungag ug Cabatbatan.

Matud ni Palimer nga niadtong buwan sa Septiyembre niining tuiga nagdumili ang maong 13 ka mga pamilya kansang mga balay naa sa kilid sa bungtod dihang ilang gipahimangnoang pabalhinon sa laing lugar tungod kay nameligro sila kung ugaling dunay mahitabong landslide.

Apan kagahapon, ang maong mga tagbalay mao nay nanghangyo sa lokal nga kagamhanan ug nagpatabang nga mabalhin tungod kay usa sa balay sa ilang silingan miharag na tungod kay midahili ang yuta.

Sa barangay Tinubdan dunay usa ka kongkretong balay ang nakab-kab ang yuta nga gibarogan niini ug dunay poste nga mibahirig.  – BANAT NEWS