Lolo gipriso nanunggab

CEBU, Philippines - Usa ka 67 anyos nga lalaki ang gidakop sa kapolisan human kini makadunggab sa 23 anyos nga trabahante sa usa ka establisamento sa dalan P. Remedio, barangay Banilad, dakbayan sa Mandaue alas 11 pasado ang takna sa miaging gabii.

Ang gidakop mao si Rafael Lumapay, 67, minyo, kinsa maoy suspetsado nga miluba kang Adriel Kaye Arriesgado, 23 anyos, ulitawo nga taga zone Gabi, sa barangay Paknaan sa mao gihapong dakbayan.

Sa imbestigasyon nga gihimo nila ni PO1 Jesie James Galo ug PO1 Arnold Cabido sa kapolisan sa Presinto 4 sa maong dakbayan nga naglakaw lang sa maong lugar ang biktima kuyog sa kauban niini sa trabaho. Apan gikasugat niini ang suspetsado nga gituohan nilang nakainom og ilimnong makahubog ug kalit lang miibot sa giluklok niining kutsilyo ug kalit nga gihansak ngadto sa biktima apan gumikan kay nakahupo ang naulahi igo lang nasamdan ang ulo niini.

Dali nga gidala sa iyang kauban ang biktima ngadto sa Gullas Hospital sa barangay Banilad samtang nasikop usab dayon sa kapolisan ang suspetsado nga didto pa sa maong lugar ug gibalhog dayon sa ilang detention cell.

Si PO1 Galo miingon nga ang kasong frustrated homicide ilang gipasaka batok sa suspetsado.  - Romeo T. Limpangog (BANAT NEWS)