CEBU, Philippines - Gipatuman karon sa Department of Trade and Industry (DTI)-7 ang price control sa mga nag-unang palaliton sa kamerkadohan.
Kini maoy gipahibawo ni DTI-7 regional director Asteri Caberte nga ilang gipatuman ang price control sugod niadtong Biyernes sa mga nag-unang palaliton sama sa canned goods, noodles ug uban pa.
Kini human gikabalak-an nga mopahimulos sa higayon ang mga mapahimuslanong negosyante pagpataas sa ilang presyo sa mga nag-unang palaliton nunot sa nagsaka nga demand.
Nasayran nga gikabalak-an ang panic buying sa mga nag-unang palaliton sa mga tawo nga nangandam nang daan ug namalit og tingob nga konsumo ilabina kun dunay madawat nga report sa laing bagyo nga mosulod dinhi sa nasud.
Nunot niini wala usab isalikway ni Caberte ang posibleng pagkuwang sa supply sa mga nag-unang palaliton sa higayon nga dunay motumaw nga kalamidad dinhi sa nasud ilabina dinhi sa Sugbo. (BANATNEWS)