CEBU, Philippines - Patay ang usa ka Amerkano human gi-ambusan sa duha ka mamumuno samtang mopauli na unta kini paingon sa ilang panimalay sa sitio Lombos barangay Camboang lungsud sa Dumanjug niadtong Biyenes sa hapon.
Ang namatay giila sa kapulisan nga si John Walter Zuke, 64, dunay kapuyong Pilipina ug nagpuyo sa barangay Lawaan sa nahisgutang lungsud.
Samtang ang gitumbok nga mamumuno mao ang duha ka wala mailhing suspetsado nga nagsakay sa kolor itom nga binabaye nga motorsiklo nga daling misibat human sa krimen.
Si PO1 Renante Lucaylucay sa Dumanjug Police Station nga gikahinabi sa Banat News nagkanayon nga gikan sa dakbayan sa Sugbu ang biktimang si Zuke dihang gibanhigan sa duha ka mga suspetsado.
Matud pa ni PO1 Lucaylucay nga nagsakay si Zuke sa iyang van ug nagsubay sa national highway apan pag-abot sa sitio Lomboy barangay Camboang diha na kini gipa-uwana’g mga bala.
Gibutyag niini nga nadala pa unta sa mga residente sa lugar ang biktima sa Barili District Hospital apan walay swerte tungod kay nabugtoan sa iyang kinabuhi.
Sumala pa niini nga dunay samad pinusilan sa dughan ingon man sa iyang ulo nga nilapos sa agtang gikan sa kilid sa dunggan si Zuke.
Wala pay matumbok nga suspetsado ang kapulisan ingon man motibo sa maong krimen ug nagpadayon pa hangtud ning pagsuwat ang ilang imbestigasyon niini.
Si Sr. Supt. Jesus Gaquing, director sa kapulisan sa lalawigan sa Sugbu nagkanayon nga niadtong milabay’ng gabii nipadala na siya’g mga imbestigador gikan sa Provincial Intelligence Branch (pib) nga moabag sa imbestigasyon sa kapulisan sa Dumanjug.
Gipadala usab niya ang ubang sakop sa Provincial Mobile Group (PMG) aron sa paggukod sa mga suspetsado tungod kay duna na sila’y lead sa mga suspetsado.
Hinuon nagdumili si Gaquing pagbutyag kun unsay motibo sa pagpusil patay sa biktimang American national. (BANATNEWS)