CEBU, Philippines - Natapos na niadtong Sabado sa gabii ang pagsaulog sa ika-15th Press Freedom Week diha sa JSU/PSU Mariners Court sa DYLA Compound, Pier 1, dakbayan sa Sugbo.
Ang matag grupo sa mga sakop sa media ang mipahigayon og mga presentasyon gisama sa MTV ang kategoriya ug kini gilangkat sa Defense-PNP Press Corps sa pamunoan ni Mia Abellana sa Sunstar Cebu sa giawit nila ni Niña Sumacot sa The Freeman ug Rey Pasaporte sa Banat News ang kantang “Bakit Ngayon Ka Lang.”
Samtang nakuha sa pundok sa mga photojournalist nga Lens ang ikatulong ganti ug ang Media in Cebu South (MICS) usab maoy midawat sa ikaduhang ganti.
Ang tanang mga nanambong nangalingaw ug nangahugyaw sa mga gipasundayag sa matag beat organization sanglit matag grupo dunay gipasabot sa ilang mga gipasundayag sama sa mga labing init nga isyu karon sa Sugbu. Ang Defense-PNP Press Corp maoy naghupot sa labing daghang daog sulod sa pipila na ka tuig.
Ang San Miguel Corporation maoy major sponsor sa maong kalihukan samtang gisuportahan usab sa mga minor sponsors ang maong fellowship party. – BANAT NEWS