CEBU, Philippines - Midangop sa Commission on Audit (COA) ang mayoriya sa konseho sa dakbayan sa Mandaue aron mapasusi ang giingong P1 milyon nga hinabang ni Senador Mar Roxas alang sa gipatukod nga bag-ong merkado.
Si Konsehal Emiliano Rosal nga maoy chairman sa committee on budget and appropriations sa Konseho sa dakbayan sa iyang committee report miingon nga mitumaw ang katahap tungod sa iyang nakitang mga kakulian sa pag-bidding pa lamang niini.
Si Rosal miingon nga naglakip sa nakapatumaw sa pagduda mao ang midaug nga mga construction firm nga wala gyud gani nila mahibaw-i kun asa ang business address ug ingon man ang mga pirma sa mga sakop sa bid and awards committee.
Gipasabot ni Rosal nga base sa iyang nakuhang dokumento nasutang mokabat sa P770, 920 ang gigahin isip abang sa mga ekipo ug nadugangan pa kini og laing P229,080.
Dugang pa ni Rosal nga makapatumaw sa katahap nga hasta ang mga pirma sa BAC gikatahong kadudahan usab.
Si Bise Mayor Carlo Fortuna nga nahinabi sa Banat News miingon nga kinahanglang mahingpit na ang pagtrabaho sa maong merkado sanglit nagsugod na man usab ang dakbayan sa pagbayad sa giutang niini sa Development Bank of the Philippines.
Matud pa niya nga mokabat na sa P32 milyones ang ilang nabayad sa bangko sa miaging bulan sa Hulyo, gikatakda untang humanon ang maong merkado niadto pang Abril apan hangtud karon wala pa gyud kini mahuman. (Romeo Limpangog) (BANAT NEWS)