Mga kurakot sa gobiyerno angayang masilutan - Jojo Binay

CEBU, Philippines - Usa sa gihugon-hugon nga mokandidato pagka-presidente sa nasud sa umaabot nga eleksiyon nga si Jejomar “Jojo” Binay nga kasamtangang mayor sa dakbayan sa Makati ang mipaambit sa ubang mga pamaagi kabahin sa kalamboan sa iyang siyudad.

Si Binay ang resource speaker sa gipahigayong forum kabahin sa “Effective Delivery of Services through Good Governance” niadtong Miyerkules sa hapon diha sa AVR-2 sa University of Cebu, Banilad Campus, dakbayan sa Sugbo.

Ang maong kalihukan gipasiugdahan sa University of Cebu Law Students Society (UCLASS) ubos sa pagtabang sa University of Cebu Council Presidents-Banilad Campus (UCCP-Banilad).

Niadtong tuig 1986 paglingkod sa pwesto ni kanhi presidente.

Corazon Aquino si Binay ang gitudlo isip mayor sa Makati ug nagserbisyo siya sa maong siyudad sulod na sa 20 ka tuig.

Matud niini nga sa iyang paglingkod isip Mayor niadtong tuig 1986 lubong sa utang ang Makati. Sumala pa niya ang usa ka lugar mahimong magmalambuon kung higpit nga ipatuman ang balaod ug kadtong dunay mga kalapasan ang pasakaan og kaso aron masilotan ilabi na kadtong nalambigit sa graft and corruption ug gawas niini ang mga namuno kinahanglang dunay “political will.” Gibutyag niini nga usa sa mga dakong problema nga giatubang karon sa nasud mao ang kalisod, unemployment, kahapsay ug kalinaw ug graft and corruption.

Laing pamaagi nga gipadayag niini nga mahimong malamposon ang usa ka lugar kun ang ipatuman mao ang serbisyong dako ang benepisyong makuha kaysa sa presyo niini. Ang Makati maoy labing adunahang dakbayan sa nasud diin 339 na katuig kining isip political entity ug nahimong siyudad niadtong Enero 2, 1995 ubos sa Akta Republika 7854. - Brenda Batuto (BANAT NEWS)