CEBU, Philippines - Ang tulo ka mga nakontrobersyal nga mga police sa Talisay City Police Station nga sila si PO2 Roy Sarsaba, PO2 Martin Gorosin ug PO3 Eric Enad ang gibuwag-buwag og destino sa kalungsuran sa probinsya sa Sugbu.
Si Sr. Supt. Jesus Gaquing ang direktor sa kapulisan sa lalawigan sa Sugbu mipalabay kang PO2 Sarsaba ug PO2 Gorosin sa Carmen Police Station, samtang si PO3 Enad gilabay ngadto sa Oslob Police Station samtang magpadayon pa ang imbestigasyon batok kanila.
Matud pa ni Gaquing mangita siya og mga polis nga taga mainland Cebu diha sa mga isla nga maoy ihulip sa tulo diha sa Talisay police station apan kadto ra pud mga polis nga walay bati nga record.
Gipahimangnoan ni Gaquing ang ginsakupan nga magtinarong gyud sa ilang trabaho tungod kay nagtuo siyang duna pay mga susamang mga polis sa ubang dapit dinhi sa lalawigan nga susama og gipanghimo sa tulo.
Miangkon siyang ang tentasyon sa susamang mga matang sa negosyo (illegal drugs) posibleng mohimo og susamang pamaagi aron lang makabawos sa mga polis.
Samtang iyang gisalikway ang mga huhungihong nga nagdawatan og payola gikan sa mga drug lords ang mga polis sa Talisay.
Gipaabot pa usab ni Gaquing kung hasta ang hepe sa Talisay Police Station nga si Supt. Henry Biñas apilon sa kasuhan sa National Bureau of Investigation (NBI-7) una pa sila mohimo og lakang.
Apan si Dangerous Drugs Board undersecretary Paul Clarence Oaminal sa pakighinabi sa Banat News mipatangtang sa tulo pagka-deputized agents sa Philippine Drug Enforcement Agency-7.
Kini nangahulugang did-an na nga makaapil sa bisan unsang anti-drug operations ang tulo.
Giklaro hinuon ni Oaminal nga kung sad-an man ang tulo angayan silang silutan tukma sa balaod apan kinahanglang di ilubong sa limot kung si kinsang mga drug personalities ang nakaingon niini sa maong tulo ka polis.
Matud pa sa undersecretary kinahanglang lutoson ug patubagon usab sa hukmanan ang mga drug suspects diha sa Talisay.
Midugang si Oaminal nga nakadawat sila kaniadto og report sa ilang action center nga dunay mga polis ug police official sa Talisay City Police Station nga protector sa drug pushers sa maong dakbayan.
Apan wala nila kini makumpirmar gumikan kay generalized kaayo ang detalye ug di specific kun si kinsa gyud.
Nasayran nga sila si PO2 Sarsaba, PO2 Gorosin ug PO3 Enad ang nakalingkawas sa entrapment unta nga gihimo sa NBI-7 human giingong ilang gikilkilan og P50 mil si Elvincito Baguio ang uyoan sa ilang dinakpan sa illegal nga drugas nga si Maridel Obrero. – BANAT NEWS