PRO-7 di kahatag escort sa piyansado

CEBU, Philippines - Dili makahatag diha-diha gilayon og police escort ang Police Regional Office (PRO-7) niadtong mga pinirisong mopiyansa nga magpa-escort sa ilang pagpauli paingon sa ilang tagsa-tagsa ka panimalay.

Kini maoy gibutyag ni Chief Supt. Lani-O Neres director sa PRO-7 subay sa kamatayon ni Jeromy Polistico kinsa gipusil patay diha sa ganghaan sa Cebu City Jail niadtong Biyernes sa udto.

Kini bisan paman nga di lang si Polistico maoy labing unang pinirisong mipiyansa nga gipatay dili layo sa maong bilanggoan.

Matud pa ni Neres nga gikinahanglan pa kining ipaubos sa ensaktong pakisusi kun unsa ka seryoso ang hulga sa kinabuhi sa usa ka binilanggo nga mangayo’g escort sa kapulisan.

Gidugang niini nga kun ilang tugotan ang tanang hangyo sa mga piniriso nga magpa-escort sa ilang pagpauli mahurot ang mga police nga magbantay niini.

Giklaro niining wala sila'y gipili nga hatagan og escort sa PRO-7 mapa- piniriso man o kaha sibilyan basta mosubay sa ensaktong proseso pag-validate sa mga hulga matag-usa kanila.

Samtang iya usab gihulagway nga pre-mature pa ang mga pagdudang mga vigilante maoy nipusil patay kang Polistico niadtong Biyernes sa hapon.

Matud pa niini nga nagpadayon pa ang imbestigasyon sa kapulisan labot sa maong krimen.

Subling gipadayag ni Neres nga supak siya sa vigilante style killings ug walay katungod ang si bisan kinsang tawo nga mopatay ug mokumkom sa balaod kriminal man o dili ang biktima.

Samtang si Sr. Supt. Patrocinio Comendador, director sa kapulisan sa dakbayan sa Sugbu nagkanayon nga ilang pakigkitaan pagbalik si Atty. Jesus Feliciano ang abogado sa gipatay nga si Polistico.

Si Feliciano maoy kauban ni Polistico atol sa hitabo ug gituuhan sa kapolisan nga daghan kini og impormasyong makatabang sa ilang imbestigasyon.

Walay bisan usa nga taga diha sa lugar bisan og daghan ang nakakita sa hitabo nga mipatim-aw ug mihatag og pamahayag sa kapolisan gumikan sa kahadlok.

Hinuon dunay usa ka testigo nga nasuroy sa nahisgutang dapit atol sa krimen nga ila usab karong pakigkitaan alang sa dugang detalye sa nahitabo ug posibleng nakakita sa mga suspetsado.

Susihon usab sa mga imbestigador kun may CCTV camera recording ba usab ang Cebu Provincial and Rehabilitation Center sa maong hitabo sanglit nag-atbang lang kini sa CCJ.

Ang CCJ jail warden nga si Supt. Efren Nemenio nagkanayon nga guba ang ilang CCTV sulod sa usa na ka bulan ug dili na kini maka-record sa makuha sa ilang mga camera. (Guam Logroño)   BANAT NEWS)