Sundalo nakuotan maoy napriso

CEBU, Philippines – Sundalong nabiktima sa pagpanguot mao hinuoy nabutang sa alanganin human kini dakpa sa mga polis gumikan sa giingong pagpabuto niini sa iyang armas samtang naggukod sa mangunguot diha sa dalan Junquera sa barangay Kalubihan pasado alas kwatro sa buntag kagahapong adlawa.

Si Sgt. Paulino Matisadfo Ursal, nga nadestino sa Army Training Group sa Central Command gidakop sa mirespondeng sakop sa Mobile Patrol Group nga naalarma gumikan sa buto-buto sa armas diha sa maong lugar.

Si Ursal dihang gipangutana sa kapolisan human madala sa Carbon Police Station mibutyag nga nakatulog siya diha sa kalsada ug wala niya mabantaying gikuot ang iyang pitaka sa usa ka wala mailhing kawatan.

Gikatahong nagpaabot niadtong tungura si Ursal og masakyan pabalik sa Camp Lapulapu gikan nag-inom apan nakatagpilaw siya sa dalan niadtong tungura.

Mao nalang ang namat-an sa maong sundalo nga gipukaw siya sa usa ka babayeng mipahibalo kaniyang gikuot sa usa ka lalaki ang iyang wallet, si Ursal mibutyag nga sulod sa iyang pitaka ang P24 mil ug mga importanteng IDs sa militar.

Matud pa sa maong sundalo wala pa kaayo makapalayo ang kawatan base sa gitug-an sa babaye hinungdan nga iyaha kining gigukod ug dihang nakaduol siya iyaha pa kining gipasalbahan sa iyang gisukbit nga .45 kalibreng pistola apan mikaratel hinuon kini og dagan.

Ang pagpabuto sa iyang armas wala makapahimuot sa mga tawo diha sa maong dapit tungod kay giingong nagwara-wara kini sa iyang armas ug mitawag og polis hinungdan nga siya gidakop.

Naproblema ang maong sundalo dihang gipangitaan og dokumento sa paghupot niya sa .45 caliber pistol nga dunay duha ka magazine ug mga bala gumikan kay naapil sa nadala sa mangunguot ang iyang lisensya sa maong armas nga iya sa gobiyerno.

Hinungdan nga gisikop kini sa kapolisan sa MPG ug gidala sa Carbon Police Station, ang mga kauban na niini ang midala sa kopya sa lisenya sa iyang armas. Samtang si PO2 Romeo Abellana sa Carbon Police station nagkanayon sa pakighinabi sa Banat News nga gipasakaan na og kasong Alarm and Scandal si Ursal tungod sa pagpasalba niini sa iyang pistola kagahapon. – BANAT NEWS