Laing piniriso mieskapo sa Ronda Police Station

CEBU, Philippines – Lain na usab nga piniriso ang nakaeskapo ug ning tungura diha sa Ronda Police Station sa lungsod sa Ronda niadtong Sabado sa kaadlawon.

Ang mieskapo giilang si Joreven Todis alyas Jorry, 24, taga barangay Can-abujon sa bukirang bahin sa Ronda apan lumad nga taga Zamboanga del Sur kinsa nag-atubang og kasong frustrated homicide.

Sumala pa sa kapolisan kagahapong adlawa na unta niya makumpleto ang unom ka buwang sentensya sa maong kaso apan gumikan sa iyang pag-eskapo hayan madungagan pa ang panahong iyang atubangon kun kini subling madakpan.

Matud pa ni SPO1 Roger Incipido sa Ronda Police dihang nahinabi sa Banat News gituohan nila nga mga ala 1:00 ngadto sa alas 2:00 sa kaadlawon mieskapo si Todis apan alas 5:30 na sa buntag na nila mahibaw-i atol sa gihimong inspeksiyon sa jailer nga si PO1 Roman Cañete.

Giingong alas 12:30 sa tungang gabii diha pa kini pagsusi ni Cañete kauban ang laing usa pa ka piniriso nga nag-atubang og kasong malicious mischief nga si Gerry Bihay.

Matud pa ni SPO1 Incipido giguba niini ang coco-lumber nga gisumpay ibabaw sa file nga hollow-block sa luyong bahin sa selda ug gikan didto milusot kini paingon sa gawas.

Ang hepe sa Ronda Police nga si Chief Insp. Junuario Sario mibutyag dihang nahinabi sa Banat News nga kagahapon untang adlawa mapupos ang unom ka bulang sentensya ni Todis.

Apan human sa maong kaso magsugod na usab ang bag-ong kaso niini nga attempted murder nga dunay gitugot nga pyansang P120 mil kagahapon adlawa.

Matod pa ni C/Insp. Sario nga gi-serve nilang daan ang warrant of arrest sa maong piniriso niadto pang miaging semana ug kagahapong adlawa gitakda na unta nila kining i-turnover sa huwes.

Nagtuo si C/Insp. Sario nga ang bag-ong kaso niining gi-atubang maoy nakaingon nga napugos og eskapo si Todis.

Gumikan niini giparelibuhan ni Sario ang jailer nga si PO1 Cañete ug gihulipan sa bag-ong gipadalang polis ni Cebu Police Provincial Office (CPPO) Sr/Supt. Jesus Gaquing nga si PO2 Socrates Avila.

Hinuon matod ni C/Insp. Sario nga gawas nga parelibuhan ipaubos sa imbistigasyon ang maong jailer og pasakaan pa nila kini og kasong administratiba.

Nagpadayon pa ang hot pursuit operation pagsikop og balik sa maong pugante.

Kini maoy ikaduha nang piniriso nga nakaeskapo sulod ning bulana diin ang una mao kadtong 17-anyos nga piniriso sa Danao Police Station sa siyudad sa Danao apan nasikop og balik human sa 16 ka oras. – BANAT NEWS