CEBU, Philippines – Nagproblema karon ang kagamhanan sa dakbayan sa Talisay sa pagpatukod og eskuylahan sa sitio Campinsa, barangay Manipis, kay timberland ang yuta sa maong lugar.
Matud pa ni konsehal Dennis Basillote nga gawas lang kun mapanag-iya sa kagamhanan sa Talisay ang luna, dili gyud makapatukod og tarong nga tulunghaan ang kagamhanan diha sa Campinsa.
Si Basillote kinsa maoy tsirman sa komitiba sa edukasyon sa konseho sa dakbayan nagkanayon nga ila pang gihangyo ang mga opisyal sa Department of Environment and Natural Resources (DENR) nga ipa-donate niini ngadto sa Talisay ang maong lote.
Kini aron nga dili mausik ang gidonar nga mga sin sa usa ka negosyanteng Insek alang sa tulunghaan sa maong sitio.
Ang maong negosyante nagtibi dihang nakita niini ang makaluluoy’ng kahimtang sa eskuylahan sa mga bata sa Campinsa nga gitabil-tabilan lang sa mga sako ang atop ug ang bongbong niini. – Brenda D. Batuto (BANAT NEWS)