CEBU, Philippines – Mikabat sa 50 ka sakong bugas, mga kinarton nga sardinas, noodles, ug uban pa ang nadawat sa City Social Welfare and Development Office (CSWDO) sa dakbayan sa Mandaue gikan sa buhatan sa Provincial Social Welfare and Development Office (PSWDO) sa Sugbo alang sa mga biktima sa sunog sa duha ka mga sitio sa barangay Umapad.
Si Joselyn Domingo, assistant supply officer sa CSWDO sa dakbayan sa Mandaue nga nahinabi sa Banat News mibutyag kagahapon nga gawas sa mga hinabang nga gipadala sa PSWDO sa lalawigan sa Sugbo, gihimo gihapon nila ang pagpanghatag og mga pagkaon nga giluto na daan alang sa mga biktima.
Si Domingo miingon nga nagpadayon pa ang ilang paghusay sa mga ngalan sa matag pamilya sa mga biktima aron sa pagsiguro nga dili madoble ang mga ngalan sa ilang hatagan og hinabang.
Gitataw niya nga nag-abot-abot ang mga hinabang nga gipadala ngadto sa mga biktima tungod kay nanghatag man usab ang mga Non Governmental Organization (NGO), religious group, ug uban pa. - Romeo T. Limpangog (BANAT NEWS)