Voting precincts para sa Senior Citizens gitinguha

CEBU, Philippines - Giawhag ni Cebu City Councilor Rodrigo Abellanosa ang Commission on Elections (Comelec) nga butangan og special voting precincts ang mga senior citizen sa siyudad.

Kini aron madasig ang mga senior citizen sa dakbayan sa pagbotar samtang nagkaduol na ang gitakdang eleksyon sa sunod tuig.

Matud pa ni Abellanosa nga makapila na siya makadungog nga dunay mga senior citizens nga dili mamotar sa piniliay tungod kay ang ilang presinto tua sa katapusang andana sa tunghaan.

Gawas niini, ang ubang mga senior citizens giingong dili usab makaagwanta sa pagpinaabot sa ilang turno sa pagbotar tungod sa taas nga linya.

Gitataw ni Abellanosa nga nalatid sa balaud nga ang mga senior citizen hatagan gyud og express lanes aron masayon ang ilang mga transaksyon ug ang Comelec dili exempted niini.

Ang konsehal nga maoy chairman sa Cebu City Senior Citizens Council miingon nga panahon na nga himoan og special voting precincts ang mga senior citizens.

“Urgent gyud na nga himuon kay ang uban dili na man makabutar, magpangita pa sila og asa sila nga presinto, mas maayo na nga hatagan sila og kaugalingong voting precinct nga ibutang sa ground floor sa building aron mahatagan sila  og kasayon,” sumala ni Abellanosa.

Usa ka resolusyon ang planong ipalabang sa konsehal sa City Council nga mag-awhag sa Comelec nga hatagan unya og special voting precinct ang maong sector.

Gani niingon si Abellanosa nga lakip sa angayang hatagan og kaugalingong voting precinct sa Comelec mao ang gitawag og Person With Disability (PWD).

Dili buot si Abellanosa nga himuong rason sa mga senior citizen ug sa mga PWD ang ilang physical condition sa pagpadaplin sa ilang katungod sa pagbotar.

Nagtuo ang konsehal nga dili na lisud alang sa Comelec ang paghatag og special voting precincts tungod kay computerized na ang umaabot nga eleksyon.

Nasayran nga ang dakbayan sa Makati maoy unang nipalabang og resolusyon nga nag-awhag sa Comelec paghatag og special voting precincts sa mga senior citizen ug PWD. – BANAT NEWS