Sub-standard nga school equipment ipasusi ni Maambong

CEBU, Philippines - Nabutyag nga depektuso ang kadaghanan sa mga lingkoranan ug lamesa sa mga magtutudlo nga giapod-apod karon sa nagkalain-laing mga tulonghaang elementarya ug hayskol sa probinsya sa Sugbo.

Una kini nga gibutyag sa mga magtutudlo ug kadagkuan sa mga tulonghaan nga nakadawat niini gikan sa kontraktor nga maoy namanday niini.

Samtang si Bokal Victor Maambong nga mipahibawo niini sa mga tigbalita miingon nga kinahanglang masusi kini sa komitiba ni Bokal Juan Bolo, chairman sa committee on education.

Matud pa niya imbes bolt ug screw, lansang ang gigamit sa Gala Industries nga maoy kontraktor sa maong proyekto.

Unya imbes marine plywood alang sa lamesa, ordinaryo ra nga plywood ang gidapat maong dali kaayong naukal.

Sayo niini ang Department of Education sa probinsya sa Sugbo maoy mihimo sa subasta alang sa P17 milyones nga “armchair and desk project” sa maong departamento alang sa tuig 2007.

Nahimong mananaog ang Gala Industries Incorporated bisan pa man kun kini maoy ikatulong miduso og menus nga presyo alang sa maong proyekto.

Nag-una nga ubos og presyo mao ang JEC Lumber Corporation ug gisundan kini sa Ramagal Industries Corporation.

Apan ang mga sakop sa Bids and Awards Committee nga gipangulohan ni Judiana Corriente mihatag sa proyekto ngadto sa Gala Industries Inc. sa rason nga ang duha ka mga kontraktor dili maayo og performance sa ilang mga trabaho.

Gitumbok nila nga misumiter kini og mga sayop nga kasayuran ngadto sa BAC hinungdan nga sila wala makadaog sa proyekto ug dugang pa niini nga “blacklisted” usab ang duha gumikan kay nalangan nila paghuman ang ilang mga proyekto sa DepEd sa miaging mga tuig.

Ang kadagkuan sa JEC Lumber Corporation ingon man sa Ramagal Industries kusganong mihimakak niini.

Si Corriente mitataw nga tanan nilang mga gihimo gibase gyud sa nalatid sa balaod ug walay kahiwian sa gihimong subasta. – BANAT NEWS