Security Agencies giawhag sa pagsigurong gibansay ang mga sakop

CEBU, Philippines - Nanawagan si Cebu City Acting Mayor Michael Rama ngadto sa nagkadaiyang mga security agency nga siguruhong husto og training ang ilang mga gwardiya.

Kini human duha na ka mga gwardiya ang aksidenteng nakapabuto sa ilang mga armas nga miresulta sa pagkaangol sa unom ka tawo sa managlahing dapit ug adlaw.

Ang unang insidente nahitabo niadtong Lunes diin usa ka gwardiya sa mall nga si Abraham Duran ang aksidenteng nakapabuto sa iyang .9mm service pistol ug miangol sa tulo ka tawo lakip na ang bata.

Niadtong miaging adlaw laing security guard usab nga si Clyde Villardal ang aksidenting nakapabuto sa iyang service shotgun ug miangol usab sa tulo ka kawani sa Granduke Lending Corporation human maigo sa fragments ug nadala gihapon sa tambalanan.

Matud pa ni Rama nga angayang pahinumduman kanunay sa mga security agency ang ilang mga gwardiya bisan pa man kung kini napaubos og training.

“They have their own agency training program and I’m pretty sure of that but it is better that it should be repeated or made as a reminder,” sumala ni Rama.

Gani nidugang ang acting mayor nga siya mismo mainampingon sa paggunit og armas tungod sa iyang pagtoo nga kini usa ka delikadong butang.

“Because of my notion that an empty gun can even kill a man how much more for a gun with bullet on it,” nagkanayon si Rama.

Nanghinaut ang acting mayor nga usa lang ka isolated case ang duha ka managsamang hitabo ug dili na masubli sa umaabot nga panahon.

Una nang gisugyot sa kapulisan nga ipaubos og re-training sa gun safety ang mga security guard aron sa pagsiguro nga malikayan na ang accidental firing.

Samtang ang PNP mosusi usab karon sa report nga dunay mga security agencies ug ‘academies’ nga naghatag og mga certificates bisan walay formal trainings ang ilang mga gwardiya, samtang duna say mga security agencies nga nagpa-duty og mga gwardiya bisan walay mga lisensya. – BANAT NEWS