CEBU, Philippines - Gikonpirmar sa Sugbuanong Press Secretary Cerge Remonde nga si Presidente Gloria Macapagal Arroyo mobisita ni Mayor Tomas Osmeña karong adlawa, Biyernes.
Matud pa ni Remonde sa interbiyu sa DYRF nga buot gyud ni Arroyo nga personal nga mahinabi ug makumusta ang kahimtang sa panlawas si Osmeña kinsa bag-ohay lamang naabot gikang nagpa-chemotherapy sa Estados Unidos.
Apan gitataw ni Remonde ang pagduaw ni Arroyo kang Osmeña tipik ug kabahin lamang sa regular nga pagbisita ni Arroyo sa Sugbo matag bulan.
Gawas sa pagpangumusta sa mayor, si Arroyo gikatakda nga modiskurso sa Asia Pacific Convention sa Kiwanis International diin tambungan kini sa mga delegado sa tibuok Asia ug Pacifico sa Waterfront Hotel, sa Lahug ning siyudad. Mosubo usab si Arroyo sa plaza sa Cebu Metropolitan Cathedral.
Ang Sugbuanong kalihim mitumbok usab nga may ubang kalihukan ang pangulo sa pagduol og balik dinhi sa Sugbo apan padayon pa kini nga gi-finalize.
Midugang si Remonde nga posible usab nga dinhi sa Sugbo matulog ang pangulo sa nasud karong gabii kay giisip man ni Pres. Arroyo ang Sugbu nga ikaduhang pinuy-anan gawas sa Malacañang. (BANAT NEWS)