CEBU, Philippines – Gihagit karon ni Dr. Rowena Burden ang project chairperson sa Miss Cebu 2009 nga si Philip Rodriguez nga moluwat na sa iyang katungdanan.
Kini human mabulabog ang Miss Cebu 2009 sa dihang lain ang gitunolan sa Texters Choice Award ug dili ang tinuod nga midaog niini nga si Kimberly Therese Burden, anak sa doktora.
Alang kang Dr. Burden, dako ang responsibilidad ni Rodriguez pagpahigayon sa nahisgutang beauty pageant isip project chairperson.
Apan tungod sa kontrobersiya nga mitumaw atol sa coronation night gilauman sa doktora nga boluntaryong moluwat si Rodriguez sa katungdanan.
Nasayop hinuon si Burden tungod kay hangtod karon wala pay timailhan nga moduso og resignation letter si Rodriguez ngadto sa Cebu City Tourism Commission (CCTC).
Gani miluwat pa og pamahayag si Rodriguez sa miaging pipila ka mga semana nga siya dili mopahawa sa katungdanan tungod kay giingong walay misulti usab kaniya niini.
“Magpaabot pa diay siya og sultihan, wala gyud siya'y delicadeza, wala gyud siya makasabot nga dapat na siyang mo-resign,” sumala ni doctor Burden.
Nagduda na hinuon ang doktora kun unsay giapas ni Rodriguez sa iyang katungdanan tungod sa pagdumili niini pagpahawa sa iyang posisyon.
“Wala na ta kasabot kun nganong dili siya mo-resign unsa man gyud ang naa anang posisyona,”dugang pamahayag ni Burden.
Una nang gipadayag sa doktora nga ang pagpalagpot kang Rodriguez sa Miss Cebu maoy usa sa iyang gusto nga himuon sa CCTC.
Gipasalig ni Dr. Burden nga dili niya ihinayon ang pagpasaka og tukmang kaso kung taktakon ang mga responsable sa kontrobersiya nga naglakip kang Rodriguez.
Malaumon hinuon ang doktora nga sila mahatagan og katagbawan sa ilang reklamo pag-abot ni Mayor-on-leave Tomas Osmeña dinhi sa Sugbo sunod buwan.
Kini subay usab sa gipahibalo ni City Administrator Francisco Fernandez nga ang mayor mohimo og drastic action pagbalik unya niini dinhi sa Sugbu. (Elly Bolonso) (BANAT NEWS)